Advertising
English News

ကမ္ဘာသန့်ရှင်းရေးနေ့ စစ်တွေပွိုင့်ကမ်းခြေတစ်လျှောက် စုပေါင်းအမှိုက်ကောက်မည်

နိရဉ္စရာ၊ စက်တင်ဘာ ၁၄

41666364_2096999606978772_3516815674045366272_n

၂၀၁၈ ခုနှစ်၊ စက်တင်ဘာလ ၁၅ ရက်နေ့တွင် ကျရောက်သော ကမ္ဘာ့သန့်ရှင်းရေးနေ့တွင် စစ်တွေပွိုင့်ကမ်းခြေ သန့်ရှင်း သာယာလှပရေးအတွက် စုပေါင်း အမိူက်ကောက်ကြမည်ဟု သတင်းရရှိသည်။

၎င်းအစီအစဉ်ကို ကုလသမဂ္ဂကလေးများရန်ပုံငွေအဖွဲ့ ( UNICEF) နှင့် စစ်တွေမြို့နယ် စည်ပင် သာယာရေးတို့မှ ပူးပေါင်းပြီး ဒေသခံလူထုများနှင့် ၀ိုင်းဝန်း ဆောင်ရွက်သွားမည်ဟု သိရသည်။

စစ်တွေ UNICEF ရုံးမှတာဝန်ရှိသူ တစ်ဦးဖြစ်သူ ဒေါ်လဲ့ရည်ဝင်းက“ ဒီအစီအစဉ်က ကမ္ဘာ့ သန့်ရှင်းရေးနေ့ အထိမ်းအမှတ် အနေနဲ့ ကျင်းပမှာ ဖြစ်ပါတယ်။ အမှိုက်ကောက်မယ့် ကမ်းခြေ သန့်ရှင်းရေးအစီအစဉ်ကို စက်တင်ဘာလ ၁၅ရက် စနေနေ့ နံနက် ၇ နာရီကနေ ၉ နာရီအထိ ပြုလုပ်သွားမှာ ဖြစ်ပါတယ်” ဟု နိရဉ္စရာ သတင်းဌာနသို့ ပြောဆိုသည်။

စစ်တွေပွိုင့် ကမ်းခြေတွင် ပြုလုပ်သွားမည့် အမှိုက်ကောက် သန့်ရှင်းရေးအစီအစဉ်တွင် စည်ပင်သာယာမှ ၀န်ထမ်း ၅၀ ၊ အန်ဂျီအိုနှင့်အိုင်အန်ဂျီရုံးများမှ ၀န်ထမ်း ၅၀ စုစုပေါင်း ၁၀၀ ခန့်ပါဝင်မည် ဖြစ်ပြီး တစ်ခြား လူမှုအဖွဲ့အစည်းများကိုလည်း စစ်တွေမြို့နယ် စည်ပင်က ဖိတ်ကြားထားသည်ဟု သိရသည်။

“ နံနက် ၇ နာရီ မထိုးမီ ကုလသမဂ္ဂကလေးများရန်ပုံငွေ အဖွဲ့ရုံးရှေ့မှာ စုဝေးကြပြီး အဖွဲ့ (၂) ဖွဲ့ခွဲကာ စစ်တွေပွိုင့်ကမ်းခြေတလျှောက်ရှိ အမှိုက်တွေကို စနစ်တကျ ကောက်ယူကြမှာ ဖြစ်ပါတယ်။ ကလေးသူငယ်များအပါအ၀င် လူသားအားလုံး အတွက် သန့်ရှင်း သာယာလှပတဲ့ ကမ္ဘာတစ်ခု ဖြစ်လာစေရန် ရည်ရွယ်ပြီး ပြုလုပ်မှာ ဖြစ်ပါတယ်” ဟု ဒေါ်လဲ့ရည်ဝင်းက ပြောကြားသည်။

ယခုအမှိုက်ကောက် သန့်ရှင်းရေးမှာ စေတနာဝန်ထမ်း ပြုလုပ်သည့် အစီအစဉ် ဖြစ်ပြီး မည်သူမဆို ပူးပေါင်း ပါဝင်နိုင်ပြီး စိတ်ဝင်စားသူကိုလည်း ပူးပေါင်း လက်တွဲဆောင်ရွက်ရန် ဖိတ်ခေါ်လိုပါကြောင်း သူမက ပြောဆိုသည်။