Advertising
English News

ပုဏ္ဍားကျွန်း ဦးရာဇ်တောင်စေတီအနီး ပုတ်ပွနေသော အမျိုးသမီးတစ်ဦး အလောင်းတွေ့ရှိ

နိရဉ္စရာ၊ ဇူလိုင် ၂၉

ရခိုင်ပြည်နယ် ပုဏ္ဍားကျွန်းမြို့နယ် ဦးရာဇ်တောင် စေတီအနီးမှ ပုတ်ပွနေသော အမျိုးသမီး တစ်ဦး၏ အလောင်း တစ်လောင်းကို တွေ့ရှိခဲ့သည်ဟု သတင်းရရှိသည်။

ဘုရားဂေါပ တစ်ဦးက “ တွေ့တာက မနေ့က ညနေဘက်မှာ တွေ့တာပါ။ ဦးရာဇ်တောင်စေတီရဲ့ စနေထောင့် သံဝေဇနိယလေးဌာန အဆောင်အောက်မှာတွေ့တာပါ။ အသက်အရွယ်ကတော့ ၂၅ နှစ်နဲ့ ၃၀ ကြားအရွယ်လို့ ခန့်မှန်းရပါတယ်” ဟု နိရဉ္စရာ သတင်းဌာနသို့ ပြောကြားသည်။

အလောင်းမှာ ပုတ်ပွနေပြီး အမည်၊ နေရပ်လိပ်စာများကို မသိရှိရကြောင်း၊ နားတွင် နားကပ်တစ်ရံပါသည်ဟု သိရကြောင်း သူက ပြောကြားသည်။

အဆိုပါ အမျိုးသမီး အလောင်းတွေ့ရှိမှုနှင့် ပတ်သက်ပြီး ပုဏ္ဍားကျွန်းမြို့မ စခန်းမှူးသို့ ဆက်သွယ်ရာ ပုတ်ပွနေသည့် အမျိုးသမီးတစ်ဦး၏ အလောင်းကို တွေ့ရှိခြင်းမှာ မှန်ကန်ကြောင်း ပြောကြားသည်။

“ ဘာကြောင့် သေတယ်ဆိုတာမပြောနိုင်သေးဘူး။ ဆေးရုံက ဆေးစစ်ချက်တွေ မရသေးဘူး။ အမည်၊ နေရပ်လိပ်စာလည်း မသိဘူး။ မနေ့ညနေက အလောင်းရတယ်။ ဆေးရုံကို ဆေးစစ်ဖို့ ပို့တယ်။ ဒီနေ့ သဂြိင်္ုလ်လိုက်ပြီ” ဟု စခန်းမှူးက ပြောကြားသည်။

သေဆုံးရခြင်း အကြောင်းအရင်းနှင့် ပတ်သက်ပြီး ရဲအဖွဲ့၏ စစ်ဆေးတွေ့ရှိချက်ကို ဆက်လက် မေးမြန်းရာ စခန်းမှူးက ပြန်လည် ဖြေကြားခြင်း မရှိဘဲ ချက်ချင်း ဖုန်းချသွားသဖြင့် မည်သည့် အတွက် သေဆုံးရခြင်းကို တင်ပြနိုင်ခြင်း မရှိပါ။