Advertising
English News

သံတွဲမြို့နယ် ကျောင်းကုန်းရွာမှ ၅ ဘာသာဂုဏ်ထူးရှင် မသဲဆုရွှေစင် ပညာသင်ကြားရေး အခက်အခဲရှိ

နိရဉ္စရာ၊ ဇူလိူင် ၂

36469055_1981398848538849_4624807216531111936_n

ရခိုင်ပြည်နယ် သံတွဲမြို့နယ် ရွှေလှေအုပ်စု ကျောင်ကုန်းရွာမှ ယခုနှစ် တက္ကသိုလ်ဝင်တန်းကို ၅ ဘာသာဂုဏ်ထူးဖြင့် ထူးချွန်စွာ အောင်မြင်ခဲ့သူ မသဲဆုရွှေစင်၏ ပညာဆက်လက် သင်ကြားရေးမှာ မိဘချို့တဲ့မှုကြောင့် အခက်အခဲများ ရှိနေကြောင်း သတင်းရရှိသည်။

အဆင့်မြင့် တက္ကသိုလ် တစ်ခုခုတွင် သူမ ပညာဆက်လက် သင်ကြားနိုင်ရေး အတွက် ကူညီ ဆောင်ရွက်ပေးနေသော သံတွဲမြို့ အစိုးရဌာန တစ်ခုမှ ဦးစီးမှူး တစ်ဦးဖြစ်သူ ဒေါ်သင်းသင်းဆွေက “ ဒီကလေးမလေးက ၅ ဘာသာ ဂုဏ်ထူးပါတယ်။ ရွှေလှေ အထကမှနေ အောင်မြင်တာပါ။ သူမက အမေတစ်ခု သမီးတစ်ခုဘ၀ပါ။ ဒီကလေးမလေးဆက်လက် ပညာသင်ကြားနိုင်ရေးအတွက် အကူအညီတွေ လိုအပ်နေပါတယ်။ ဒီအတွက် ကျွန်မတို့က ၀ိုင်းဝန်း ကူညီဆောင်ရွက်နေကြတာပါ” ဟု ပြောကြားသည်။

မသဲဆုရွှေစင်သည် သံတွဲမြို့နယ် ရွှေလှေအထကမှ ခုံအမှတ် ဒဧ-၂ ဖြင့် ၀င်ရောက် ဖြေဆိုခဲ့ပြီး ၅ဘာသာဂုဏ်ထူးဖြင့် ထူးချွန်စွာအောင်မြင်ခဲ့သည်။

သူမရရှိသော ဘာသာရပ်အလိုက် ရမှတ်များမှာ မြန်မာစာ-၇၅၊ အင်္ဂလိပ်စာ-၇၃၊ သင်္ချာ-၉၀၊ ဓာတု-၉၃၊ ရူပ-၈၃၊ ဇီဝ-၈၈ ဖြစ်ပြီး စုစုပေါင်း ရမှတ်မှာ ၅၀၂ ဖြစ်ကြောင်း သိရသည်။

မသဲဆုရွှေစင် အနေဖြင့် အဆင့်မြင့် တက္ကသိုလ် တစ်ခုခုတွင် ပညာဆက်လက်သင်ကြားနိုင်ရေး အတွက် အကျိုးဆောင်ပြုလုပ်နေသူ ဒေသခံ နောက်လူကြီးတစ်ဦးဖြစ်သူ ဦးခင်မောင်ကျော်က “ ဒီ မသဲဆုရွှေစင်ရဲ့ အဖေ ဦးမောင်မောင်ချေ က သူမ လေးနှစ်သမီးအရွယ်က ကွယ်လွန် သွားခဲ့ပါတယ်။ အမေဖြစ်သူ ဒေါ်ခင်လှရွှေက ဟင်းသီး ဟင်းရွက်ရောင်းပြီး ဒီကလေးမလေးကို စာသင်လာတာပါ။ သူ့အမေရဲ့ လုပ်အား တစ်ခုနဲ့ ဒီကလေးမလေးကို အဆင့်မြင့် တက္ကသိုလ် တစ်ခုမှာ ဆက်လက် ပညာသင်ကြားဖို့ဆိုတာ မဖြစ်နိုင်တဲ့ အတွက် အားလုံး ၀ိုင်းဝန်း ကူညီကြဖို့ ကျွန်တော်တို့အနေနဲ့ မေတ္တာရပ်ခံလိုပါတယ်” ဟု သူက ပြောကြားသည်။

သူမ၏ ရမှတ်မှာ ၅၀၂ မှတ်ဖြစ်သဖြင့် ဆေးတက္ကသိုလ်ဝင်ရန် ၂ မှတ်လိုနေသဖြင့် ဆေးတက္ကသိုလ်သို့ မတက်ရောက်နိုင်ပါကလည်း သွားဘက်ဆိုင်ရာ ဆေးတက္ကသိုလ်၊ နည်းပညာ တက္ကသိုလ် စသည့် အဆင့်မြင့် တက္ကသိုလ် တစ်ခုခုတွင် ပညာဆက်လက် သင်ကြားနိုင်အောင် ကြိုးပမ်းဆောင်ရွက်သွားမည်ဟု သူက ပြောကြားသည်။

“ အမျိုးသမီးကျောင်းသူတွေ အတွက် သတ်မှတ်ထားတဲ့ ဆေးတက္ကသိုလ် ၀င်ခွင့် ရမှတ်က ၅၀၄ မှတ်ဆိုတော့ ၂ မှတ်လိုနေပါတယ်။ ဒါပေမယ့် ကျွန်တော်တို့က သူမရဲ့ ဘ၀အခြေအနေကို ငဲ့ညှာသော အားဖြင့် ဆရာဝန်တစ်ယောက် ဖြစ်သွားအောင် ဆေးတက္ကသိုလ် ၀င်ခွင့်ရအောင် အသနားခံသွားဖို့ အစီအစဉ်ရှိပါတယ်။ မရခဲ့ရင်လည်း နောက် အဆင့်မြင့် တက္ကသိုလ် တစ်ခုခုကို တက်ရောက် ပညာသင်ကြားနိုင်အောင် စီစဉ်သွားပါမယ်” ဟု ဦးခင်မောင်ကျော်က ဆက်လက်ပြောကြားသည်။

မသဲဆုရွှေစင်မှာ တစ်ဦးတည်းသော သမီးဖြစ်သည်။ သူမအား ဆက်သွယ်ရာ ဖုန်းအဆက်အသွယ် မရသဖြင့် သူမ၏ ပြောကြားချက်ကို ထည့်သွင်း တင်ပြနိုင်ခြင်း မရှိပါ။

သူမ၏ ပညာဆက်လက်သင်ကြားနိုင်ရေးနှင့် ပတ်သက်ပြီး ဆက်သွယ်လိုသူများသည် ဦးခင်မောင်ကျော် (၀၉၇၆၂၀၁၂၁၄၀)၊ ဒေါ်သင်းသင်းဆွေ (၀၉၄၂၀၁၂၀၇၆၆) နှင့် မသဲဆုရွှေစင် (၀၉၂၅၆၇၇၆၈၈၃) သို့ ဆက်သွယ်နိုင်ပါသည်။

( မသဲဆုရွှေစင်န်ှင့် မိခင်ဖြစ်သူအား တွေ့ရစဉ်)