English News

ကျောက်ဖြူမြို့နယ် မူရွင်းရွာ ဘုန်းတော်ကြီးကျောင်းကိစ္စ တန်ပြန်ဆန္ဒဖော်ထုတ်မှု ပေါ်ပေါက်

ကျော်ဝင်း၊ ကျောက်ဖြူ
နိရဉ္စရာ၊ ဇူလိုင် ၁၀

19990526_1581543068524431_9135902939186499239_n

ကျောက်ဖြူမြို့နယ်၊ ကလန့်တဲကျေးရွာအုပ်စု၊ မူရွင်းကျေးရွာတွင် သော့ခတ် ချိပ်ပိတ် ထားသော မူရွင်းဘုန်းတော်ကြီးကျောင်းကို ပြန်လည်ဖွင့်ပေးရန်အတွက် ဇူလိုင်လ (၇)ရက်နေ့က တောင်းဆိုဆန္ဒဖော်ထုတ်ပွဲပြုလုပ်ခဲ့ပြီး ထိုဆန္ဒဖော်ထုတ်ပွဲကို ကန့်ကွက်သည့်အနေဖြင့် တန်ပြန်ဆန္ဒဖော်ထုတ်ပွဲ တစ်ခုကို ဒေသခံ ကျေးရွာသားများက ဇူလှိုင်လ ၁၀ ရက်နေ့က ပြုလုပ်ခဲ့ကြသည်။

ကျောင်းကို ပြန်လည် ဖွင့်လှစ်ပေးရေး ဆန္ဒဖော်ထုတ်ပွဲအား ကန့်ကွက်သည့် အနေဖြင့် တန်ပြန် ဆန္ဒဖော်ထုတ်ပွဲကို ဇူလိုင်လ(၁၀)ရက် နေ့လယ်(၁)နာရီခန့်က မူရွင်းကျေးရွာမှ လူပေါင်း(၁၅၀)ခန့်ပူးပေါင်းကာ ကျောက်ဖြူမြို့တွင် ပြုလုပ်ခဲ့ကြသည်။

၂၀၀၅-၂၀၁၆ခုနှစ်က မူရွင်းကျေးရွာ အိမ်ခြေ(၂၆၉)တွင် ဘုန်းတော်ကြီးကျောင်း (၃)ကျောင်းရှိနေရာ တစ်စုတစ်စည်းတည်း ဘုန်းတော်ကြီးကျောင်း တစ်ကျောင်းတည်း ဖြစ်ရန် သဘောတူလက်မှတ်ရေးထိုးပြီး ပူးပေါင်းရာ သဘော မတူသူ (၁၆)အိမ်မှ ဆန္ဒပြခြင်းကို ကန့်ကွက်သည်ကို ပြန်လည် တုန့်ပြန်သည့် အနေဖြင့် ဆန္ဒဖော်ထုတ်ရခြင်း ဖြစ်ကြောင်း ဦးဆောင်သူ ဦးထွန်းသာအောင် ကပြောသည်။

‘‘ ကျေးရွာမှာ လူအများစုက သဘောတူလက်မှတ်ရေးထိုးပြီး စုပေါင်းတာပါ။ (၁၆)အိမ်က သဘောမတူလို့ ဆန္ဒပြခဲ့တာပါ။ ကျောင်းသုံးကျောင်းက ဆရာတော်လည်း သဘောတူလက်မှတ်ရေးထိုးတယ်။ ကျောင်းသုံးကျောင်းက မွေးထုတ်ပေးခဲ့တဲ့ သံဃာ(၃၁)ပါးကလည်း သဘောတူလက်မှတ်ထိုးတယ်။ တစ်ခြားသူတွေက အဲဒီကျောင်းကို ငါတို့လည်းပိုင်တယ်ဆိုပြီး တရားစွဲရာက နိုင်ငံတော်မဟာနာယကကိုရောက်သွားပြီး ချိပ်ပိတ်လိုက်တာပါ။ ကျေးရွာ အေးချမ်းနေတာကို မူရွင်းကနေ ရန်ကုန်ကို ပြောင်းရွှေ့နေထိုင်သူတွေနဲ့ ရွာက သဘော မတူဘဲကျန်ခဲ့တဲ့သူတွေနဲ့ ပူးပေါင်းဆန္ဒပြကြတာပါ။ ဒါကို တန်ပြန် ကန့်ကွက်ဆန္ဒဖော်ထုတ်တာပါ’’ဟု ဦးထွန်းသာအောင် ကပြောသည်။

19875330_1581543581857713_2950522626472597858_n

ကျောက်ဖြူမြို့အ၀င်တွင် လူစုပြီး အထွေထွေအုပ်ချုပ်ရေးဦးစီးဌာနရုံးရှေ့လမ်း၊ ဗိုလ်ခမောက်လမ်း၊ ပြန်ကြားရေးရုံးရှေ့လမ်းမှ သာသာနာရေး ဦးစီးဌာန ရုံးရှေ့ထိလမ်းလျှောက်ကာ ကျေးရွာစည်းလုံးညီညွတ်ရေး ပျက်ပြားအောင် လုပ်ဆောင်သူ အလိုမရှိ၊ ကျေးရွာစည်းလုံးညီညွတ်ရေးပျက်စီးအောင် တစ်ခြားကျေးရွာက ကူညီအားပေးသူ အလိုမရှိ၊ လူ့အခွင့်အရေးအယောင်ဆောင် အလိုမရှိ၊ ဥပဒေကိုလေးစားပါ စသည့်စာသားပါပိုစတာကို ကိုင်ဆောင်ပြီး ကြွေးကြော်ကာ ဆန္ဒဖော်ထုတ်ခဲ့ကြသည်။

မူရွင်းဘုန်းတော်ကြီးကျောင်းကို ပြန်လည်ဖွင့်ပေးရန်အတွက် ဇူလိုင်လ(၇)ရက်နေ့က တောင်းဆိုဆန္ဒဖော်ထုတ်သူများက အတင်းဖိအားပေးပေါင်းခိုင်း၍ မပေါင်းလိုခြင်း ဖြစ်ကြောင်း၊ မပေါင်းလိုသည့် အိမ်ခြေ(၃၄)အိမ်ရှိကြောင်း၊ သာရေးနာရေး အခက်အခဲဖြစ်နေသဖြင့် ကျောင်းကို ပြန်လည် ဖွင့်လှစ်ပေးရန် တောင်းဆိုဆန္ဒဖော်ရခြင်း ဖြစ်ကြောင်း ပြောဆိုသည်။