English News

မေယုဒေသတွင် အကြမ်းဖက်မှု ကျူးလွန်နေသည့်အဖွဲ့ကို တရားဝင် ထုတ်ပြန်ရန် ညီနှောင်တိုင်းရင်းသားပါတီများဖက်ဒရေးရှင်းမှ တောင်းဆို

နိရဉ္စရာ၊ သြဂုတ် ၁၀

20708168_1612615605417177_1008713667299442948_n

မေယုဒေသတွင် အကြမ်းဖက်ကျူးလွန်မှုများ မကြာခဏ ပေါ်ပေါက်နေရာ ထိုအကြမ်းဖက်မှုများကို မည်သည့် အကြမ်းဖက်အဖွဲ့မှ ကျူးလွန်နေသည်ကို နိုင်ငံတော် အစိုးရနှင့် သက်ဆိုင်ရာ တာဝန်ရှိသူများမှ တရားဝင် ထုတ်ပြန်ရန် ညီနှောင်တိုင်းရင်းသားပါတီများဖက်ဒရေးရှင်းမှ တောင်းဆိုလိုက်သည်။

၎င်းတောင်းဆိုမှုကို သြဂုတ်လ ၈ ရက်နေ့က ညီနှောင်တိုင်းရင်းသားပါတီများဖက်ဒရေးရှင်းမှ ရခိုင်ပြည်နယ် မောင်တောမြို့နယ်တောင်ပိုင်း ကိုင်းကြီးကျေးရွာမှ လူနည်းစု တိုင်းရင်းသားများ ဖြစ်ကြသည့် မြိုတိုင်းရင်းသား ၈ ဦးအသတ်ခံရခြင်းနှင့် ပတ်သက်ပြီး ထုတ်ပြန်ထားသည့် ထုတ်ပြန်ချက်တွင် ဖော်ပြထားသည်။

မောင်တောဒေသတွင် ဒေသခံ ဌာနေတိုင်းရင်းသားများအား မကြာခဏ အကြောင်းမဲ့ သတ်ဖြတ်မှုသည် အဖွဲ့အစည်းတစ်ရပ်မှ နောက်ကွယ်တွင် စီမံဆောင်ရွက်ခြင်း ဖြစ်သည်ဟု ယုံကြည်ကြောင်း၊ ထိုသို့ ဒေသခံ ဌာနေတိုင်းရင်းသားများအား အကြမ်းဖက်သတ်ဖြတ်မှု ဖြစ်ရပ် ဖြစ်ပေါ်တိုင်း နိုင်ငံတော် အစိုးရနှင့် သက်ဆိုင်ရာ တာဝန်ရှိသူများမှ မည်သည့် အဖွဲ့အစည်း ဖြစ်သည်ကို တရားဝင် ထုတ်ပြန်သင့်သည်ဟု ယူဆကြောင်း ဖော်ပြထားသည်။

ညီနောင်တိုင်းရင်းသားပါတီများ ဖက်ဒရေးရှင်းတွင် ရခိုင်အမျိုးသားပါတီ၊ ရှမ်းတိုင်းရင်းသား ဒီမိုကရက်တစ်ပါတီ၊ ချင်းအမျိုးသား ဒီမိုကရက်တစ်ပါတီအပါအ၀င် တိုင်းရင်းသားပါတီ ၂၂ ပါတီ ပါဝင်ကြောင်း သိရသည်။

(ကြေငြာချက် အပြည့်အစုံ အောက်တွင် ဖော်ပြထားသည်)